La ministrèz l’outre-mer la vni La Rényon.D’apré mon santiman, èl la koz èk nou, èl la trète anou, zistoman konm lo pti Prézidan, i di li vé pi k’i fé... èl la shoizi la tète pou rann vizite. Byinsir èl la parti Tampon, pou oir avèk son zyé lo rézilta lo plann rolans lo gouvèrnman... Zot la byin antandi, èl la parti Tampon, sirman pars lo mèr i nyabou amontr "pate blansh" konm di lo kont,"pate ump", byin antandi.
I prétan dir, èl la parti détak baro in krèsh, donk èl la fé la rouvèrtir. Sa in bon n’afèr, pou vréman, vi k’i mank si tèman la plas la krèsh pou bann marmay é nana si tèlman bann paran la bézoin fé okip z’ot zanfan kan zot i sava travay. Oui, in bon n’afèr pou vréman ! Sof ké, a s’ki paré, krèsh-la lé rouvèr dépi bélaz-é-botan… La zis ranz-ranz in pé, pou boush lo zyé é pou mète lo mèr in pé an-valèr .Si sa lé vré… sa in n’afèr i fé ri... In n’afèr k’i fé ri ?
Mi pans pa si bann l’antropriz, konm bann z’ouvriyé la byin ri... sirtou sak té i atann lo shantyé la rokade pou an avoir in travay in pé konsékan : plis san milyon l’éro… larzan té la, larzan fè, mi di azot... Lo mèr la bate in koud pyé d’dan... Mi pans pa banna la ri, pars dan l’éta k’nou lé randi, sa i fé pa rir ditou !

Justin

lésplikasyon inn-dé pti mo :

amontr pat blansh : konm dann listoir bann ti kabri, le lou i amontr pat blansh.
dépi bélaz-é-botan : dépi in bon koup de tan.
i prétan dir : i paré.
ranzé : réparé ;
ranz’ranzé : réparasyon gro doi.