« Prévnir sé guérir ! »

Zot i koné sirman kozman-la, pars dann in bonpé sityassion lé shoze i tourn pa ron pou vréman ar fote in prévnans korèk bande zotorité. Mé kan mi parl bande zotorité an promyé mi oi l’éta, pars sé li lo promyé résponsab dann sète afèr – li épi bande fors réaksyonèr. Li épi bande profitère, pliss lo sistème kliyantélist. Li épi linzistis. Li épi linégalité, épi azoute ankor avèk sa lo manke solidarité.

Mézami an dalonaz, mi koné par kère sak in pé lé paré pou dire. Zot i pé di par égzanp, bande famiye i gingn larzan san travayé, la plipar néna in toi dsi la tèt. Lékol lé gratuite é bonpé rante bande marmaye pi bande jenn i travaye pa an konsékanss. In foi in pé la fine di sa, zot i tire tout suite toute in panopli la répréssyon, zote i promète la prizon, é final de konte zot i domande tyinbo dsi larzan zanfan.

Mi konpran tré bien d’moune i pé z’ète dézolé oir zot kartyé ravazé. Mi konpran bien in mèr kan li konstate larzan invèsti final de konte sé a pèrte. Mi konpran galman bande zélu kan zot i konstate avèk dépitassyon ké léfor fé la pa ansèrv konm i fo, la pa donn lo rézilta zot téi atande.

Mé mi panss pa i fo domande la répréssion, épi i fo domande rotien larzan bann famiye dann lo bézoin. Okilé lo plan d’lite konte la mizère ? Okilé in lédikassyon in pépliss adapté avèk bande zanfan ? Okilé sinploman la politik dévlopman ? Okilé lédikassion popilèr ? Pars sak i fé zordi é dopi in bonpé l’tan i vo pa pliss k’in kotère dsi in zanb do boi. La mizère ? La p’assé, mète ankor.