Oté

La mizik an dèye : apré Henry Maingard, André Legras i tourn la paz

Justin / 18 novanm 2019

JPEG - 43.6 ko

Mi sort antann dann radio, André Legras lé désédé dann la nui samdi pou alé dimansh. Lo azar i vé ké son désé i ariv apré sète Henry Maingard néna zis in pti koup de tan. Kisa i lé bann moun-la ? Avèk in n’ot dalon zot té i fé lo trio Jokarys. Trio-la lé éné dann bann zané soisant é pou sak l’avé la shans dann tan-la alé Lisé Leconte de Lisle zot téi pé oir bann moun-la toulmoun téi koné azot konm mizisien.

Akoz mi parl azot banna ? Pars pou moin sé in késtyonn kultur : banna i fé parti la kultur La Rényon, admiré par désèrtin, kritiké par d’ot mé finalman si listoir-nout listoir-I rokoné in n’afèr sé ké trio Jokarys sa téi fé parti la kultur rényonèz pandan in bon koup de tan. Dizon in trio moin popilèr ké d’ot-popilèr dann sans zot té i fé pa parti bann mèm klass sosyal-mé sa la pa in krétik, pars konm d’ot tout bann moun-la l’avé La Rényon dann kèr. Sa sé sak pou moin lé lo pli inportan.

Zot l’avé La Rényon shoviyé dann kèr dann zot promyé pèryod épi dann zot dézyèm pèryod kan zot lété plizyèr zartis pou shant ansanm dann in group téi port lo mèm nom : l’avé zot, lo promyé trio, épi l’avé galman Daniel Vabois, Dormeuil, épi Jacqueline Fareyrol la grann shantèz fonnkèr, toulmoun mi pans i koné isi La Rényon… Par l’fète, inn sèrtènn pèryod l’avé sak té pour l’avé sak té kont : in pé téi jir arienk avèk séga, d’ot èk maloya, d’ot ankor avèk d’ot kalité manifèstasyon nout kiltir konmsi ni diré té pa posib èm tout la kiltir nout péi, é téi falé fé son shoi-prann son parti. Dizon lo tan téi vé sa !

Oui ! Mé kan ou i fé in shoi, ou i élimine épi ou néna konm in parti pri dann out fason éliminé. Ou i élimine pa par défo dsi la kalité-sa sé in shoi i fo fèr-, mé konmsi ou téi mète in pé a l’ékar par raport zot shoi d’sosyété épi la fason zot i roprézant la shanson rényonèz. Mé fransh vérité lo pèp l’a zamé lèss ali tronpé dizon par in shoi idéolozik : kan li yèm, li yèm in poin sé tou. E kan li yèm sa i vé dir li aprésyé kan i mète La Rényon anlèr.

Jokarys l’avé son piblik téi yèm ali pou vréman. Li fé parti, konm moin la di, lo mouvman kiltirèl rényoné é tanmyé si tazantan bann shanson zot la shanté i pass an boukl dann nout tète : tanmyé si « Bishik la monté », sansa si « kane mapou lé dou », mèm si ni sava pi « boulvar la providans dann tan la sézon mang mir » pétète nou va antann ankor, an pasan rant bann gran pyéd’boi, mèrl apré shanté « mi, mi, mi yèm mon péi » é si mi tronp pa sa sé in n’afèr inportan sa-sé lo pli inportan ?