Mèrkrodi moin la di azot la zoli montr la zoli amontrèz la pèrd, la dispari é lo mari la diréktris la mélé pou artrouv lo bijou. La anvoye bann marmaye rodé : promyé foi bann marmaye tousèl. Dézyèm foi avèk lo konkour Sin-t’antoine de Padoue mé la pa ro-trouvé non pli. L’èr katrèr i tard pa arivé é lo mari la diréktris i dmann koman i sava fé pou trouv la montr-la. Li la armète bann marmaye an ran épi li la di.

L’avé inn foi pou inn bone foi mésyé lo foi la manz son foi èk in grinnsèl.
Lo mari la diréktris la ropran la parol épi li la di : « So kou isi mi mète l’afèr dan la min Sin-éspédit ! ». Bann fiy la pléré. La kizinyèz la fé son sign de kroi. In pé la résite « zé kroi an dyé », nénène zanfan la fé sète foi lo sign de kroi. Bann garson téi tranb dobout. Lo mari la diréktris la roparl ankor in kou é li la di : « Marmaye avèk Sin-’ékspédi i plézant pa. Sak la volé si inn la volé lé fini pou li : li sèk an plas ! Kroi amoin, kroi pa in kouyon. »
Bann fiy la mète a pléré. Bann garson la romète a tranblé. Kizinyèz la résite la priyèr. Nénène zanfan la fé sète sign de kroi ankor in kou. Lo mari la dirékstris la di : « Marmaye alé rodé : Sin-ékspédi i zoué pa ansanm ! Alé azot épi trouv ! ». An volaye bann marmaye la dispèrsé : ki dann zardin, ki dan lo gran l’alé rozyé. Ki dann in karo galé. Ki dann park koshon la fouyé, la fouyé.

Kriké ! Kraké ! Kriké Mésyé ! Kraké Madam !
Momandoné konm in rimèr la monté. Zilber tonm kriz, éstéri, zozèf, Parl pa épi ankor in n’ot moin la obliyé l’ariv groupé é tout marmaye la mète a répété : La trouvé ! La trouvé ! La trouvé : La zoli montr lo zoli madmoizèl é tout lo grpup l’avans diréksyon La Diréktris. Sète-la la domandé : « kisa la trouvé ? ». Estéri la défossé. Zozèf la di li té ansanm mé pa li la trouvé pou vréman ; Zilber tonm kriz la di : « Zot tout la vi an mèm tan ! ». Parl pa la pa di arien : normal li koz pa… Lo mamzèl amontrèz la pran son afèr é la bien romèrsyé shak moun la trouv son n’afèr ? Marmaye i atann touzour. Zot i vé lo mari la déréktris i dédouane azot pars i fo arète lo sor éstèr. Lo boug la di : « Sin ékspédi si ou lé dakor ni arète la, épi li la di bann maramye Sin ékspédi i arète l’afèr. »

Poin final :
La klosh la sone katrèr pou tout bann marmaye rotourn z’ot kaz. In néstan tout marmaye la fané konm niyaz zoizo… Astèr moin, lo rakontèr, mi di azt : si zistoir lé vré, li lé vré ! Si zistoir lé mantèr la pa moin l’otèr. Vi k’moin la vann konm moin l’ashté.

N, I NI-Mon zistoir la fini. Zistoir la montr volé lo zoli mamzèl té i sort Sin-Dni pou fé lékol dan léo.