Pèrsone i pé pa donn amoin la démanti la dsi ! Pars la vi, sa lé konmsa : ou i marsh kate pate gran matin, dsi dé pate l’èr i ariv midi, épi dsi troi pate lo soir. Mi pans zot i koné sa konm moin pars dann tan Ulysse, in roi grèk démèrdèr, té i koz déza konmsa. Ou lé éné, ou la grandi épi in zour ou i sava l’ot koté la vi. Rish aou, maléré aou, la mor i vient rap aou koté ou i lé. Fransh vérité, mon bann dalone dalon si la vi té i ashté, kroi amoin bann rishar nora pa mor zamé. Sof in n’afèr, sak nana l’arzan i pé gingn lo bon soin é sak lé o flan lo mové soin : inn i done in kou d’pous la vi, é l’ot i done pa. Mé nana pou réfléshi la dsi é sé pou sa mi lèss azot kass z’ot koko é ni artrouv pli d’van sipétadyé.