Dé foi, dan la vi, ou na lokazion trouv demoun vré. I ariv ké ou i frékant azot in pé, kisoi konm dalon, kisoi konm kamarad, kisoi lokazion in travay, sansa in projé. La plipar d’tan, ou na poin tro le tan majine kisa lé an fas de ou, kèl sé son listoir, kèl sé son parkour. Nou, dann parti kominis, nou na in grann shans vi k’nou la konèt épi ni pé konète ankor sak la fé listoir nout péi dann tan la rézistans kont pouvoir kolonyal é lo moun ni trouv souvan défoi sé in éro, mèm in si li sé in éro ordinèr, in moun sinp, ou i pé aproshé san ète arfoulé. So pansé-la i travèrs mon léspri dopi l’tan moin l’aprann Roland Robert la tonm bien malad dann in misyon li té apré fé dann l’oséan indien. Pli fort rézon zordi ké li la fine alé l’ot koté la vi.

Ziska zordi, moin la lir sak demoun la di dann so lokazion-la, moin la ékout sak demoun téi di dann radyo, sansa dann télé.. Zordi mi pans la vi i donn aou la shans rankont demoun bien, mé konm ou i vé pa anbaras la pèrsone, pars ou i koné èl lé bokou okipé - la vi piblik sa sé in n’afèr i manj lo tan - donk konm ou i vé pa jéné, ou i rès in pé a l’ékar. Sa lé normal. Moin pèrsonèl mi sava oir inn pèrsone bokou okipé, arienk kan moin na in projé, sansa in n’afèr pou fé ansanm.

Donk, an parlann Roland Robert, moin té la, an parmi in bonpé d’moun kan la poz plak pou bann viktime lordonans oktob 1960. Mi sava pa anparl azot de sa, pars sé in konba an parmi in bonpé Roland la améné. Mi vé solman dir in n’afèr. Ala kosa : la fé in manifèstasion,é kan lo manifèstasion lété fini, moin la trouv Roland - zot i koné li té in viktim lordonans oktob 60 ! -, épi moin la di, i fo ou i ékri listoir out vi. Pa pou flaté, pars sé in n’afèr mi koné pa fé, mé solman pou dir ali li apartien listoir La Rényon é so listoir-la i fo bann rényoné i koné épi i transmète sa zénérasyon an zénérasion.

Li la réponn amoin, na d’moun i ékri épi d’ot i ékri pa... poitan, kan li té i ékri dann Témoignages, mi souvien li té ékri bien. Bin alor, pou kosa li la di amoin sa ? Pétète, pou li, li té pa in onm inportan pou nout péi. Pli sirman, mi pans, solon li, li té in moun ordinèr,.. pa in éro. Poitan...

Justin