Mi koné pa si zot lé konm moin... pars tout demoun lé pa parèy... toulmoun i rode pa an avoir lo mèm rézilta kan zot nana in n’afèr pou fé. Touléka, mi pé dir azot, si i konfyé amoin in missyon inposib, moin mi bar, mi tay la briz, pars pou moin, i ansèrv de riyin aksèp in missyon si ou i koné ou i gingn arpa ariv o-bi, si ou i koné par avans oute afèr i sava foiré.
Lèrla, mi pans bann moun byin désidé pou la plipar, bone volonté galman, i aksèp in résponsabilité pou fé la guèr kont l’ilétrism. Mi koné in pé dan la bann... kan la konfyé azot résponsabilité-la, zot la pans : mi sava fé si, mi sava fé la, patati, patata, mi sava tyé sète, blèss katorz. L’ilétrism, antansyon moin lé la ! Mi sava kapote aou ki-si-tète !
Mé, élas, ménélas, mon kèr lé an filas, ni oi pa in bon rézilta. Ané pou ané, lo nonm demoun ilétré i diminyé pa, i rès aporé parèy, mèm to-mèm to... Mi éspèr bann moun-la nana d’ote shoz pli intéréssan pou fé dan la vi, d’ote z’afèr zot nana in pé siksé dodan. Mi éspèr ! amoins ké zot i sousyé pa tro so missyon-la.
Pou sak i rode in pé… nana k’i rode !... pou kossa i gingn pa in bon rézilta dann tik-tak la, mi diré azot... akoz zot i sar pa rode la rézon par l’fète i gnor kaziman la lang matèrnèl… i gnor lo kréol rényoné.
Moin la fine antann gayar gayar diskour, avèk gayar-gayar l’idé déssi lo rol nout lang matèrnèl dann l’instriksyon bann marmay… mé mi oi pa aplik sa zamé… i kontinyé manyé tout bann zoutiy lé pa éfikas ditou, i ansèrv pa aryin, é pandann tan-la, kabri i manz salade, bann bordé l’édikasyon i rès bordé l’édikasyon. Konm k’i diré, la, na konm in défo ! La, na konm in l’érèr !

 Justin