Mi pans zot la fine konprann la sékirité alimantèr sé in pé mon marote sa… Sof ké pou moin, li la pa in marote, li sé kaziman in poin dann in program pou mon péi.D’ayèr, na poin mistèr, sa i fé parti d’lé vinn-sink poin parti kominis la fine marké dann son program. San mantir, moin lé dakor èk sa

Vantredi soirmoin la parti in rényon pou roganiz zardin dann tout l’androi la tèr lé an défalké-an frish si zot i vé dir é an parmi lo bann plantasyon banna la pans plant fouyapin : dizon lo roi pyéd’boi pou donn manzé bann kréatir dsi la tèr. I paré sa la bien rann anou sèrvis pandan la guèr, konm patate avèk manyok la bien soutien anou. In bon projé ? Touléka in bon l’idé.

Samdi matin moin té avèk inn-dé dalon pou in rényon. Avan k’i komans i koz koz in pé é ala kosa inn i rakont : na in gro touf banbou dsi son bitasyon. Koman-koman na in bourzon la pous par dosou in galé plate donk li la pa gingn la plas pou grandi. Solman son baz-son shou si zot i vé-la larji, la larji in bonpé ziska gingn in shou bien larj, bien blan é tann vèy pa koman. Konm koi la natir, si ni gingn suiv ali nana dé shoz pou amontr anou.