Oté

La néna konm in l’érèr d’ma par !

Justin / 17 out 2018

JPEG - 43.6 ko

Moin lé sir in pé va dir amoin, mi yèm okipé sirtou bann zafèr i konsèrn pa moin dirèktoman. Pou kosa mi di sa ? Pars zordi mi vé anparl azot bann zéfé éskolèr : zordi i tonm lo zour la rantré non ? Moin lé konm toulmoun.

Kan moin l’avé zanfan téi sava lékol moin téi domann amoin toultan pou kosa in bonpé zéfé konmsa pou bann ti marmaye. Zordi moin na pi zéfé pou ashté pars moin na pi zanfan i sava lékol mi domann amoin touzour pou kosa i fo in bon pé zéfé konmsa pou in marmaye aprann lékol. Pars nou lé bien dakor, lo bann zéfé i doi ansèrv bann marmaye pou bien aprann lékol.

Sansa dé fèye rakète torti avèk in zépine tranpé dann lank noré asé. Si pou pa aprann myé vo bann marmaye lé pa ankonbré. Néna poin in sak i pèz sépa konbien, épi in takon kayé, liv zébzèrsis, liv tout kalité matyèr étsétéra la ké lo ra.

An touléka, sanm pou moin, lo kantité matèryèl domandé i doi alé avèk nout manyèr konprann lédikasyon épi l’instriksyon épi sak i apèl lo lakizisyon bann konpétans. Antansyon mi sava pa maye tousala avèk lidéolozi dominant. Pars i pouré dir : nou lé dann in sosyété la konsomasyon é konm nout tout épi tout zanfan sé dé fitir konsomatèr, domann in bonpé matèryèl sé komans aprann i fo bonpé konsomé. Konmsa pou in pé ranpli z’ot kofor.

Oplis i ashté zéfé, oplis lo marmaye épi son bann paran lé bien plasé pou konpran lo kantité lé plis sipèryèr ké lo kalité. Plis ou néna sé plis ou lé bien armé pou bien fèr fas la sosyété d’konsomasyon é rantr-an touléka sé sak in pé i pans-dann l’indistri la konésans vitès gran V.

Tro zour moin la di : si in téléfone portab i pèz solman san sinkant gram é si li pé pèrmète amoin ranplas sink sis kilo liv, papyé kréyon é tutti kwanti é mèm plis afèr mi sava sharj amoin konm in bourik ? Afèr mi sava kass mon pov ti do mon zanfan sansa mon pti zanfan ? La néna in kékshoz i dépass amoin in pé. Konm in lérèr d’ma par.