I di kan ou sava loin out péi, lontan, in moman ou nana kafar, mazinasyon, ou pans, konm in nafèr ou rogrèt ou la kité, ou na poin lé moyiin arnni, ou rèv, i fé mal ou i féd biin, i di :… aa, boug la na la nostalzi son péi.
Non a moin, défoi moin na lanostalzi lanfans ; konm in nafèr mon anfans moin la iémé, moin la gard bon souvnans.
Atann, moin na touzour in léktir i anvoy a moin loin, loin dan lespas, loin dan lo tan, dan lo pasé, sé in nostalzi.

Moin lapré lir Albert Camus, in filozof alzérien, vintiinmsièk… dan son liv « le premier homme », li rakont sa vi marmay, son papa lé mor la gèr 14-18, lékol, li té pov, konm son mèt dékol té i inm a li, i fé prépar a li konkour lisé.
A moin sak lar fé mont a moin loin loin dan mon propr vi sé sèt povreté, moin na osi in mèt la mark a moin ; oui koné sé zanr d profésèr lé plis kin papa –po in métrès ti diré pliss kinn monmon ou otan.

Oua dir a moin kèl rapor antr la Rényon ané 30-40 é Alger ?
Dan in koloni fransèz, lalzériin osi i koné pa la nèz, i komans lo programe léktir par sézon in kréol i koné minm pa sé koué !Lotone ? Féyi zone lo van i pous dann somin ;a nou isi nou la po koup kann !
I parl a ou gran péi plat, sari, blé ; minm lé zabi lé pa lo minm, manto, kasné, vergla, pér noèl konm in bonome la nèz : trouv drol Daniel WARO i kri son maloya ; « kari la nèz son momon patri !? »

Lontan la Rényon:t i lanp (ou gro lanp, zot i rapèl boutik sinoi) pétrol, la bouzi, réso alkol.
Ramas zanvlop palmis po vann inn par inn po ginyi inn ti moné ; zanponn palmis i souf la kaz po anbar lo van. NOSTALZI.

 Justin