Mésyé, Médam, La Sosyété koz èk moin sé koz èk in kouyon, mé sé o pyé d’lo mir k’i oi lo mason. Sépa si zot la romarké kan i ariv aou in mové zafèr la nuite lé touzour pli dir ké la zourné : kisoi out prop maladi, kisoi la maladi in famiy, kisoi ankor la solitid sansa d’ot zafèr la pa bon konm siklone épi tranblomann tèr. Aprésa, kan lo zour i ariv, toutsuit ou i san aou in pé myé. Ni pé di galman la nuite i fé noir é lo fénoir li agrav ankor lé shoz suivan in poinn vizé sinbolik. Lo zour i fé klèr é lo féklèr li fé pass in pé lo mové l’èr. Astèr si ni rogard bien provèrb nou la mark an-o la i invite aou pou ète optimis, i donn aou a konprann lo mové i tard pa pasé, é biento nora lo bon. Alé ! mi kite azot rofléshi la dsi é ni artrouv pli d’van. Sipétadyé.