Si zot la gard télé, sansa ékout la radyo, zot la sirman aprann konm moin, sé par la fote ALbioma lizine léstrésité si Boirouz-lizine sikriyèr- i pran pa kann bann plantèr dopi granmatin bonèr : la vapèr i fé défo, é la vapèr i provien l’izine Albioma.Moin lé sir, vi ké bann léktèr Témoignages néna in gran kiltir popilèr, zot lé paré pou dir :i kont pa dsi bato tonton pou travèrs la rivir.É konm zistoman Lizine do sik i baz dsi lizine léstrésité Albioma pou gingn lo vapèr li la bézoin, ébin, oila pou kosa dopi so matin bonèr lizine i rosoi pi kann bann plantèr.

Sa i ariv souvan sa ?In pé souvan vi k’dopi komansman la koup sa l’ariv kinz zour d’ran.Bin pou kosa lo vapèr ? Pars bann moulin kann i travaye lo zi kann ziska tir lo maksimom do sik(saccharose) dann kann. A s’ki paré la bézoin kat Moulin pou tir in maksimome do sik dann ji kann.é i pare sirtou kan lo ji i sort dann troizyèm Moulin, sé l’èr I aplik ali in kou d’lo bouyan pou in méyèr rannman an sik : I apèl sa in prosédé l’imbibition-i mouye ali a fon..Zot i suiv amoin zot la ? M’ashèv dir azot konm la vapèr donk lo lo bouyan i sort albioma, konm ké la poin zordi, ébin i gingn pa mète an aplikasyon lo prosédé l’imbibition. E konm i gingn pa tir lo sik konm k’i fo,l’arète lo bann moulin.

Mé la pa tousa : moin la touzour aprann kan in mashine i tonm an pane souvan konmsa mèm si i di la bien répar ali,sa i vé dir la pa réparé mé la brikolé donk la fé in réparasyon pou pa diré é si i fé konmsa, sa i vé dir i fé pi d’ dépans pou li é si i fé pi d’fré pou li, i prépar ali-mi koné pa si lé vré, mi majine sinploman- in l’antèrman promyé klass sansa i vé sinploman artourn an aryèr avèk sharbon.Pétète i vé pi tro la byomass la ! Pétète sa in présyon dsi gouvèrnman sa !Mi di konm mi san é mi pé asir azot l’afèr i san pa bon. I diré l’apré mate in pyèz kont la biomass épi kont kann la ? An dsou Albioma la pa apré fé in pti dann do gouvèrnman li la épi dann do nout natir rényonèz. Moin lé pa sir, mé lé konmsi !

Justin