Déssi bankète arièr dann kar, lavé kat boug èk in shinoi : sa i fé pa rir sa. Pétète si mi di : « lavé kat boug avèk in komor ! », lé riskab an avoir inn-dé pou rir. Poitan, sa i fé pa rir non pli. Zot i souvien lo zistoir poupète noir dann la kanpagn éléktoral ? Mi pans pa si dmoun la trouv sa intélizan, mé la kouyonis la pa in sirkonstans aténuante.

La-ba, dann Paris, lavé in match fotbal épi in bann siportèr la tir in gran band la toil épi lavé tout sort zirman kont bann moun i viv dann lo nor, i apèl azot bann ch’ti... Sèrvis d’ord la rash lo bandrol, solman la rès assé d’tan pou demoun oir, lo prézidan la répiblik an parmi. Biensir, la porte plint ! Biensir la polis i fé son lankète ! Solman, sak lé pir sé k’mi pans in pé dmoun la ri, mé lo vré ch’ti, li, li la pa ri. Épi tout moun sak i kroi pou vréman, si la tèr tout demoun lé frèr ék sèr, sa bann moun la pa ri.

Kan nou va konprann zistoir la ras sa in bétiz, kan nou va bien mète dann nout tète, nou lé mélanzé épi nou lé bien konmsa, pétète va arète èk sa... Lé vré lo rasism lé pini par la loi, mé kansa va niabou rash sa dann kèr d’moun... oté ! Rasis-la, la pa arienk Paris, sa !

Justin