Oté

« La pa avèk in flanbo i rode in zafèr pèrdu an plin zour » 

In kozman pou la rout

Justin / 11 févrié 2019

JPEG - 43.6 ko

Kozman-la, sa in kozman l’Afrik mé sa i fé pans amoin in zistoir absurd moin la fine rakont azot. I déranj ar pa zot si mi répète lo zistoir : in moun i rode in shène doré d’arzan dans la nuite. In koté na la limyèr, l’ot koté lé noir konm dann in four. Li rode koté kléré é demoun i di ali si li lé sir son lobzé la tonm koté kléré, li réponn non, mé koté i fé noir li ris pa d’oir arien… Dizon sa in zistoir absurd konm kozman mi di azot zordi. Dabor sa i vé dir in flanbo i sèrv ar pa arien dann l’antropriz ni parl, épi si ni vé la pa bézoin gaspiye lé shoz pou ariv in rézilta. : dê bon zyé i fé l’afèr ! Moin la fine konète demoun i mète 2 nap dé foi 3 dsi in tab é kan ou i dmann azot pou kosa ; zot i réponn aou sé pars i fé pli prop alé oir sa i prouv pa arien. Alé ! Mi kite azot rofléshi la dsi é ni artrouv pli d’van. Sipétadyé !