• Matante Zélida la ékrir Justin :
Mon shèr nové, mon spès salté,
I diré d’issi, mi oi out sourir an transh papaye. Di pa non ! Ou lé kontan, ou lé fyèr ! Par raporte de koi ? Pars mon pti prézidan la parti parl latonomi, la-ba, dann la Martinik. Mé, solon moin, ou lé kontan avan l’tan, pars latonomi mon pti prézidan la pa latonomi bann rouj-de-fon. Zot té i vé sépar La Rényon avèk la Frans, donkalor pou fèr anou d’tor ; alé oir Sarkozy, sé in onm de droite é la droite i vé nout byin. Tok ! Pran sa pou ou !

• Justin la fé aèl pou répons :
Mon vyé matante, prèv vivante na poin laz pou di la kouyonis,
I fo pa di moin lé kontan pou in n’afèr i rogard bann la Martinik é pa La Rényon. Pou nout par, sak ni aprouv sé lo référandome kan nana in gran problèm pou trouv la solisyon, in problèm i mérite in votasyon la popilasyon. Mé nou ni koz pa konm lo prézidan : ni di nou la bézoin fé in bonpé z’afèr pou tir nout pèp dann malizé. Donkalor, tout Rényoné i mète dakor déssi so bann poin. Kan nou lé fine dakor la-dsi, ni di : Prézidan, donn anou lo pouvoir pou mète nout bann projé anlèr. Lé bon pou nou, épi si i fo, bann Rényoné i vote ! Ou i oi kossa ni vé ? Lé pa konpliké. La pa bézoin arlèv in guèr la fini dépi lontan…

Justin