Matante Zélida la ékrir Justin :

Mon shèr nové, mon spès salté,

Moin la vi dann télé désèrtin moun apré di, l’androi zot i lé nana travay pou fé. Biensir na travay. Partou na travay pou fé. La pa lo travay k’i mank, sé lo pèyman k’i fé défo. Lé vré ké zot i réklam pa in travay normal, péyé par in anploiyèr, kisoi in partikilié, kisoi in l’antropriz, kisoi in koléktivité, zot i vé in kontra édé. Mé in kontra édé, sa i fo péyé galman. La fini lo tan in pé té i pans l’arzan, in péi té i pé fabrik konm li vé, kantité k’li vé, l’èr k’li vé. Tan-la lé fini... Mi koné pa bien l’moun la manifès La Plène, mé moin na konm l’inprésion sé bann rouj-de-fon k’i ranpli zot koko d’tèt avèk la kouyonad. Pars sak zot té i di, sa lété la kouyonad pou vréman. Tok ! Pran sa pou toi !

Justin la fé pou répons :

Mon vié matant k’i koz touzour la bouh rouvèr,

Mi antan bien sak ou i di, mé moin lé pa sir bien konprann aou. Pou kosa ? Pars dann in péi konm La Rénion, shomaj lé si tèlman katastrofik, é bann z’anploiyèr lé pa sitan solvab ké sa, donk lo kontra édé, sé in bon solision. Touléka, lé pli préférab ké riyin. Solman, kan nana plis san soisant mil shomèr, si ou i éspèr bien diminié lo shomaj gras bann kontra édé, té konm si ou i vé vid la mèr avèk in dé pou koud.* Ou i anparl la késtionn l’arzan ? Mi sort antann, gouvèrnman nana vin miliar pou distribié bann l’antropriz pou goumant zot prodiktivité. Ou i souvien matant kan prézidan Sarkozy la désid done la bank par santèn miliar l’éro ? Donk, konpar in pé tousala, pèz lo pour, pèz lo kont, épi oi ou mèm kosa lé prioritèr la-dan ! Pou demoun normal, lé pa nésésèr diskit ziska l’infini pou shoizi in priorité. Tok ! Pran sa pou ou !

Justin

* Biensir, pou alé pli loin, i fo in bon plan pou nout dévlopman.