Mésyé, Médam, La sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami mi pans zot i koné kosa i lé « lant » konm zot i koné kosa i lé « lo pou ». Lo pou ! Oté lé ga mon tète i komans graté kan mi majine bann bébète-la. Lé vré koméla sa lé rar, mé fitintan mi pé dir azot sa lété in fléo pou nou étan marmaye. Koman téi gingn sa ? La plipar d’tan avèk in n’ot marmaye mé firamézir kan lo pou i trouv la plas pou fé son ni dann out tète, li roprodui. Sa i rapèl pa zot in laktyallité sa ? Bien sir ké oui : kovid-19 demoun l’améné é astèr ni pé z’ète an-nuiyé èk sa pou in bon bout tan. Astèr kozman-la sé in provèrb é ni pé ansèrv ali san parl la maladi : i di pa l’antrènman marmaye kan out zanfan i fé bétiz donk ala ankor in ka sak lé déor i fé déga anndan. Mé pé sfèr sa i pé amenn bon zafèr pou nou si ni kopyé bann bon zégzanp. Alé ! Mi kite azot rofléshi la dsi é ni artrouv pli d’van. Sipétayé.