Matante Zélida la ékrir Justin :

Mon shèr nové, mon spès salté, rouj-de – fon dovan l’éternité,
Ala k’in pé i komans ankor pou krétik mésyé Didier. Pou dir la vérité vré, bann krétikèr la pakor arète krétiké. So kou isi, par raport lo féstival Sésèl. Kosa in pé i krétik so kou isi ? I krétik konsèy réjyonal pars i donn l’arzan pou roganiz lo féstival Sésèl : in gran féstival avèk vinn-nèf péi la partisipé. Zot i pans pa lé normal i ède inn-a-l’ot dann in féstival konmsa ? Si zot i trouv pa normal sé ké, pou zot, lo kodévlopman na poin in sans ditou. Arzout èk sa lo kodévlopman avèk bann zil l’oséan indien ! D’apré zot, sa la pa in l’okazion fé konète La Rénion, son valèr, son gayar épi tout sak i fé k’in péi i apèl bann vizitèr pou vni shé zot. Rozman mésyé Didier la pa dégonflé dovan bann kritik. Ni vé ni vé pa, nout l’avnir lé osi dann l’oséan indien é lo l’avnir, sa sé in n’afèr k’i doi z’ète préparé. Tok ! Pran sa pou toi !

Justin la fé pou répons :

Mon vyé matant ki koz touzour la boush rouvèr,
Moin lé konm vou, mi trouv normal shakinn i ède inn-a-l’ot, sitrtou kan nou lé péi frèr. Solman oila, vi soré dir amoin kansa Sésèl la ède anou fé kékshoz ? Mi souvien pa. Mi souvien ké kan Sésèl lété ataké, nout parti kominis la fé son méyèr posib pou défann la répiblik Sésèl, é sa, dann in tan difisil.

Moin lé konm ou, mi vé bien ké ni ède nout bann voizin kan zot lé dann la difikilté. Kansa ? Par ébzanp kan siklone i kraz Madégaskar… mé sa, i diré bann la droit i èm pa sa pou vréman. Kansa ankor ? kan demoun Komor i mor dann kwasa-kwasa, mi pans i fo ni dénons in n’afèr konmsa é sirtou ké ni bate pa la min pars plis vin mil komor lété ranvoyé shé zot shak ané.

Mi antan dir, pou l’IRT, féstival Sésèl sé inn grann foir pou sak i profite l’arzan rényoné. Mi vann konm moin l’ashté é mi éspèr i an voudra pa d’moin… Pars, mi vé dir i fo pa ni kroi ké nou mèm nou lé si rish ké sa, pars la mizèr i vien kongn dsi la port in bonpé d’moun La Rényon. Pars si ni fé pa antansion nou lé riskab fini konm Job dsi son ta fimyé. La pa pars nou l’apré gaspiy lo kagnote anmasé par Paul Vergès ké ni pé kroir nou lé rish. Konm di lo kont, la pa bézoin matla divé kan ou lé dsi la plime. Tok ! Pran sa pou ou !