Lé ga, dépi inn-dé zour, la plui i done paké. Par kou d’in-èr-d’tan, li grènn, li grènn mèm : tou zis si, afors tonbé, talèr i pèrs pa lo trou dann tol.
La météo lavé byin di, kan li la done in l’avèrtisman : tansyon- pangar, gro plui i sava tonbé… ! Solman, a s’ki prétan, la done l’avi-la zis avan l’avalas i komans.
Alors, in pé partou demoun i kri : o sékour, lo la bou i rant dan la kaz, i palank le mir l’antouraz, gran-gran morso la rout i shap dann fonn ravine…

Sa siklone Jade l’otèr.
Konm d’abitid, in pé i kriy pars na tro d’lo, in pé i kri pars na poin d’lo : i inkyèt pou konète si Véolia la fé pas in kominiké konm de koi i sava koup delo.
Mon dyé ségnèr, la mori frite ! Koman i fé pou bingn marmay ? Koman i fé pou kui manzé ?... Kosa ? Ramas lo la plui ? Lé fou don ?

Akoz bann gro blan i ramas pa lo-la-plui zot ? Moin lé sir z’ot lo la pa koupé ! Moin lé sir, robiné i done pou kasé, i gingn la tranblad z’ot kaz !...
Poitan ramas lo-la-plui, la pa si bète ké sa. I pèrmète mèm fé z’ékonomi si ou lé moindreman in pé roganizé : la pa bézoin ète savan pou konète sa ! La pa bézoin sort mat-sup (matèrnèl sipéryèr !) pou pans fé in n’afèr konmsa !

Justin