Oté

« La pa bézoin tir défo dsi d’moun, rogard azot dann in glass é zot va oir tout défo dovan zot. »

In kozman pou la rout

Justin / 14 zwin 2019

JPEG - 43.6 ko

Mi koné pa kisa la di kozman-la, mé pétète sé moin sinploman la tir sa dsou mon shapo. Akoz pa ! Moin la pankor pèrd mon droi non ! Romark i di souvan dé foi : « konm ou i lé, ou i ziz lé z’ot ! » é d’apré moin lé dé kozman i raprosh inn avèk l’ot. Pou kosa ? Pars demoun kan zot i parl de zot, zot néna konm l’inprésyon zot néna tout kalité(postula pou démaré) é lé zot néna tout défo. Alon méfyé pars pou ziz lé zot i fo ni koné anou nou mèm konm lo saz grèk téi di é lo pli myé posib mé la pa souvan lo ka… Si ou i vé konète aou, i fo ou i okip out ka sèryèzman. Sèryèzman ? La plipar d’tan ou i pansh dsi out ka avèk lamour épi l’indilzans. Kan ou i pansh dsi lo ka lé zot sé konm ou néna in fizi braké dsi. Alor mi donn azot é moin mèm in konsèye : si zot i vé rouv zot boush pou koz dsi l’moun poz azot plizyèr késtyon : lé vré lé pa vré ? I ansèrv kékshoz, i ansèrv pa arien ? I rolèv d’in bon sansa d’in mové l’intansyon ? Apré sé a zot de oir. Alé ! mi kite azot rofléshi la dsi é ni artrouv pli d’van. Sipétadyé !