La pa domin la vèye, pétète, mé la pa pou sa ni doi kontante anou d’sa !

Mézami, yèr avèk avan-yèr té bande zourné pou lo patrimoine. Zot i koné néna zafèr pou oir issi La Rényon, kèstyon d’patrimoine é d’apré sak mwin la vi dann télé épi d’issi d’laba dann shomin de moune la bien profité pou oir dé shoz zot na pwin lokazyon oir toute l’ané. Tanmyé pou l’moune !

Mé oila, zot i koné kan i parl patrimoine, zot i panss bien souvan dé foi sa i poze problème. Bien sir, ni pé kontante anou rogardé, admiré, trouv gayar. Ni pé mèm réklame k’i rofé, k’i réabilite, k’i aranze, k’i protèze, k’i mète toute zafèr an valère.. Mé momandoné ni pé domandé kissa la fé bande zafèr-la é dann kèl kondission la fé bande zafèr-la.

Noute toute i koné koman lé difisil fé la route issi shé nou, konn té difissil pou fé batiman sirtou dann in tan l’avé poin si tèlman lo zoutiye k’i fo pou fé toute so bande travaye Hercule : ni pé dmande anou konbien d’moune lé mor sansa la sorte éstropyé pou fé bande travaye-la.., dann tan lésklavaze, dann tan bande zangajé, dann tan la koloni épi apré.

Ni koné sirman si ni vé savoir kissa la pran lo mérite pou zot-gouvèrnèr, préfé, zinzényère, mé lé pa sir ni pé konète sak lété ésploité é sirésploité, sak la zamé toush in réparassion, é sak lété méritan, mé zot mérite lété pa rokoni… Zot va dir amwin la pa domin la vèye, mé la pa pou sa ké ni doi èstime anou kontan avèk sa.