Sans prop ? La pa difisi pou konprann é la pa bézoin an avoir bak +25 pou sa. In montangn, sansa in kap, la plipar d’tan, li fé pa ou arien li. Out pyé la pa pou tourné, out doi d’pyé la pa pou vir an po jak avèk in kou d’kongn. Mé sa i pé ariv avèk in sinp galé, in bout lé antéré dan la tèr é in bout i dépass, sansa in sinp galé i roul kan ou i poz out pyé dsi. Mé sans figiré alor, kosa sa i vé dir ? Sanm pou moin i vé dir, dan la vi, la pa touzour in gran problèm pou amène aou la vi dir, in sinp problèm i sifi : kisoi in problèm travaye, larzan, ralé pousé rant famiy. Sa i sifi pou déranj aou san pour san, sépa si talèr ou i rode pa in pon pou sote o-t’an-ba. E fini avèk out ras pou in n’afèr i vo pa la pène. Alé ! Mi kite azot rofléshi la dsi é ni artrouv pli d’van. Sipétadyé !