Somanké koméla lé pikonmsa, dopi k’la shanj gouvèrnman ! Sétaki, kisoi lo prézidan, kisoi lo gouvèrnman, kisoi bann moun la pa minist mé lé dann gouvèrnman la désid fé in bann réform. Ziska lo minist l’édikasion la désid fé son réform. Tout minist lédikasion nasional i fé z’ot réform. I démonte sak l’ote la monté, i armonte in n’ot afèr. Final de kont, pèrsone i konpran pi arien.
Donkalor, lo minist la fé son réform:dabor inn, siprime in bon pé post amontrèr, épi i di samdi i féra pi lékol, épi ankor kan nora la grèv bann z’anployés la komine va avèy marmay, épi ankor va fé lékol dann vakans. Pa tro : dé zour koma, pou bann zélèv lé in pé faye, avèk bann amontrèr volontèr, épi bann zélèv sak z’ot paran lé volontèr.
Ay-ay-ay ! Dizon in bouraz dé krane !Akoz si lo marmay lé fèb, la pa pars li sava pa lékol, la pa pars son mètr lé pa kalifié, pétète sé akoz lékol lé pa tayé pou li ? Alors, in zour an moins par issi, dé zour an plis par-la, « in rotour o fondamanto » - kossa i lé sa ? Konm di mon kamarad la pa invant zèf bouyi, « fondamanto, fondamantèr ! ».
Touléka, la pa èk sa konm diré kréol bann marmay sak lé fèb v’ariv la gare. N’ar trouvé !

Justin