Kosa sa i vé dir ? Sa i vé dir, danzé lé pa touzour l’androi ou i kroi. Gèp, ou i oi ali : ou i oi son zèl, ou i oi son kor an dé parti. Avèk la tète sa i fé troi. Mé a bien rogardé sanm pou moin, li lé pa pli danzéré k’in papiyon. Poitan si li la poz dsi ou, doulèr pou ou. Zargiyon ou la pa vi, mé sé sa ké lé mové pou ou : avèk son pikir, son doulèr, épi kan li gonf… Lo danzé li lé pa touzour vizib mé sa i vé pa dir i fo pa méfyé d’li. In l’égzanp ? Kouran : ou i oi pa li, mé si li la sokous aou sa lé mové. Mazine ankor in pyèz : sé kan i pèz aou d’dan ké ou i konpran out malèr.

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan dakor rantre nou.