Matante Zélida la ékrir Justin :
Mon shèr nové, mon spès salté,
Mi éspèr ou la byin défilé. Ankor, moin lé a d’mandé, pars d’apré sak moin la vi dann télé, l’avé aryink troi kat grin mé pa vréman in bon zépi. Somanké, zot la fine komans romarké, alé fé lo kriyèr d’nuite dann shomin, sa i ansèrv de riyin ? Somanké, mé moin lé pa sir. Mé défilé, vouzote, sé pa donn travay kréol, sé pa non pli goumante la retrète. Défin papa la travay toute in vi, la gingn la rotrète dé zour, épi la lèv paké la parti si tèlman li l’avé éskinte son kor afors travay. Touléka, la pa bann rouj-de-fon k’i fatig azot dann travay. Tok ! Pran sa pou toi !

Justin la fé pou répons :
Mon vyé matante k’i koz toujour la boush rouvèr !
Si oute défin papa la pa manj son rotrète pandan lontan, touléka, vou-la, sa i fé kéktan ou i gingn oute moné, é mi oi ou lé pa préssé d’arété. Finn konte, mi trouv ou na la shans, vi k’ou i viv vyé. Mé shakinn son shans déssi la tèr : inn i sava bonèr, l’ote i diré k’i rèss pou lo grin. Fransh vérité matante, la pa pars ou in moun lété mizèr dann travay, li doi ète mizèr dan la rotrète. Mi oi in sèl solissyon, sé tir larzan dann posh sak nana an tro, pou gonf in pé lo pla sak la poin an sifizans... Tir dan la posh sak na poin pou donn sak na poin, la pa in bon tik-tak ditou.

Justin