Kozman moin la mark an-o la, moin la fine mark sa dann Témoignages. Mé mi armark ali pars lo l’aktyalité i ramenn sa dann l’ord di zour. Dopi in bon koup de tan la rout Silaos lé koupé affors sosh la déboulé o moins troi koté. Sé dir si l’moun sak i avbite an o épi i sava travaye an-ba, sak lé pri an-ba é liemré mont la-o. Parl pi bann touris lé dann sirk konmsi zot lété dann kasho.

L’èrla, l’mazinasyonn moun i karbir san pour san é ou i antann demoun, apré rakont sak zot i koné dann radyo. Kosa par ébzanp ? Na in madam i rakont é sa lé vré pou vréman, avan siklone 48 l’ilet furcy té i apèl antré-dë-shomin. Ou téi shanj transpor pou pran in n’ot kisoi an montan k’i soi an dsandan. Mé l’ané 48, bann tète do zèf la désid koup shomin-la si tèlman ké zot la fé in rout kosté avèk in ranpar é sa i déboul tazantan.

In n’ot la di, i fo raz lo kap konmsa nora pi arien pou déboulé. In n’ot la di konm de koi arpran lo rout provizoir l’avé fé néna in bonpé d’tan... In pé la rolèv lo ka d’la rout par l’an-tré-dé pars l’avé prévi, fitintan, in rout par Dimitil mé prévi i vé pa dir k’la fé.

Mésyé lo mèr Sin-Lé, pou son par, in l’amouré bann téléférik la fé in konférans do prèss pou di, avèk trépé larzan li pé fé in télé férik dopi Sin-Lé ziska Silaos. Lo mèr Silaos, la pran son shomin la kite lo konférans, pars konm mi di an-o la la pa kan ou l’apré noiyé k’i fo aprann nazé... Mi pans moin na rézon ! Non ? An tou lé ka té pa lo moman pou anparl de sa.

Pandan s’tan la kabri i manz salad. Ni artouv san tro tardé.

Nb - Gouvèrné sé prévoir. Sa in bon loi sa ! mé in bon loi, ou i aplik pa, sé in promèss pou soular.