Lakey lo sit > Chroniques > Oté
« La pa kan ou la fain, ou i sava mète manjé o fé »
In kozman pou la rout
vandrodi 19 zwiyé 2019, sanm
Mésyé , médam, la sosyété, mi pans zot i konpran bien kosa provèrb-la i vé dir : li invite anou par l’fète pou in bon lorganizasyon nout tan. La pa solman in késtyonn manzé mé in késtyonn vi sinploman. Pars néna in n’ot provèrb i arsanm in pé sète-la épi i di : « La pa la vèye l’ouvèrtir la shass i fo komans drèss son shien ». La plipar d’tan, nout tout, ni konpran bien lé shoz konmsa, mé i ariv ké ni mank épi, forséman, ni tonb an rotar… Mi rapèl mon papa lété i rakont tazantan : li la parti la shass é kan li la rotourné li la pass la kaz demoun li téi koné bien-dizon famiy mèm !- biensir la invite ali boir kafé, mé pou sa i fo alé la boutik ashté kafé an grin, épi griye lo kafé, épi moulé épi fé koulé sitèlman lo moun té la la gingn in pti tass kafé kan la brine l’arivé. Si tèlman son madam-donk mon momon-la dispité apré li kan li l’ariv son kaz. Alé ! Mi kite azot rofléshi la dsi é ni artrouv pli d’van. Sipétadyé