Oté

La pa kréol kont fransé é fransé kont kréol, sé inn+ l’ot dann l’intéré in bon l’instriksyon pou =bann zanfan épi pou bann jenn rényoné

Justin / 21 out 2019

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité moin lé sir vi doi z’ète kontan kan vi oi in sèrpan la mèr la rolèv ankor. Souvan dé foi sèrpan-la i rolèv : in pé lé pour, in pé lé kont, é na poin pèrsone lé indiféran par raport kékshoz konmsa. Mon nové, ou la fine konprann mi éspèr kosa mi vé anparlé la ? Mi vé anparl kréol dann lékol bien antandi. Konm i di koméla, sa sé in kékshoz k’i fé lo Buzz konm shak foi isi La Rényon. Donk mi sava par di aou sak mi di toultan é sak bann moun bone volonté i arète pa répété. An gro, pou lékol nou néna konm lang prinsipal lo fransé, in gran lang kominikasyon épi in gran lang kitir-inn shans po nou !-l’èrla mi oi pa kosa ni gingnré konm avantaz larg la proi pou l’onbr. La proi étan lo fransé élo lonbr étan lo kréol. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, i étone pa moin antann aou koz konmsa. Vi oi bien matant, lo tan i pass, lo déba i anrishi, néna bann nouvo zétid, néna bann nouvo konklizyon mé ou ou i shanj pa-ou i débouj pa in iota. Ou néna la souplès lo vèr d’lanp.
Solman, si pou ou, lo déba i port ankor dsi kréol dann lékol, lé rogrétab dir aou la pa la dsi li port sé zour isi : gouvèrnman, konm bann zasosyasion, aktèr kiltirèl, artis étout, lé dakor pou kréol dann lékol. Moin la mèm pa antandi in l’ofisyèl apré di i fo bate aryèr, i fo ni rotourn konm dann tan la mèr Michel. In bataye gagné mi oi pa pou kosa li rokomansré.
Bien antandi bann vré partizan kréol dann lékol i méfyé bann sèrvis ofisyèl. Moin la mèm lir in moun apré di : i vo myé in vré zènmi k’in fo zami. Moin pèrsonèl mi partaz pa in poinvizé konmsa, pou moin sa i rolèv d’in rapor d’fors é si, konm mi kroi, lo rapor d’fors lé favorab par raport la promosyon nout kréol rényoné i fo anprofite lokazyon fé avans nout lang kréol rényoné.
Astèr antansyon la zamé di : « sé fransé kont kréol é kréol kont fransé ». Séinn plis l’ot pou in bone réisite bann zélèv rényoné. Tok ! Pran sa pou ou !