Oté

« La pa l’èr ou la fin, i fo alé mète manzé dsi l’fé »

In kozman pou la rout

Justin / 18 mé 2018

JPEG - 43.6 ko

Fé konm ou i vé. Mète kari la vitèss o fé. Fé kisoi in kari lo ton, kisoi in kari boit bèf, kui manzé sa i mète lo tan. Donk si ou i atann ou la fin pou mète manzé o fé, lé riskab ou la pi fin kan manzé lé kui . Lé posib galman ou i komans grignoté an atandan é sa, toulmoun i koné, lé pa bon pou la santé. Soman, mi pé dir azot mi koné d’moun i atann zot la fin pou alé mète manzé o fé. Sé in tor an zot. Mé, astèr si ni obliy in kou lo manzé épi la fin, ni romark néna in gran kantité d’moun i pran pa zot a tan pou fé in n’afèr nésésèr, an aplikan lo bon prinsip ni koné : i fo zamé fé lo zour mèm, sak ou i pé romète pou landmin. I ariv dé foi lé tro tar éou i gingn l’annuiman pou arien ditou. Alé ! Mi kité azot rofléshi la dsi é ni artrouv pli dvan. Sipétadyé.