Kan bann shomèr la parti dann in l’ajans pol-anploi pou domann in "sir-réminérasyon" zot sédik, moin la antann in pé dir, banna na konm in kou d’foli, konm in pé i di, in kankrola dann plafon. Moin la mèm antann in pé dir, so bann moun i travay mèm pa pou in éro é ala k’zot i domann in goumantasion. In pé n’ora profèr zot i fèrm zot boush, épi zot i marsh a-l’onbr, san fé oir azot pli k’i an fo.

Pétète déssèrtin la pans banna té apré sèrv poisson-pilote pou la préféktir, konmsa i rofiz bann z’éléktrisien in sir-réminérasyon sinkant-dé pou san. Lé possib ! Épi l’opinyon lé tèlman bien informé, plito bien manipilé, ké zot lé pa loin pans bann z’éléktrisien, "so bann profitèr", l’apré pran azot an otaz. Pétète galman in pé la pans bann shomèr l’apré amontr gouvèrnman kèl koté li pé fé zékonomi, san an avoir bézoin tro fé travay son tète.

Mé fransh vérité, si nout lékonomi é nout sosyété lé konm li lé, la pa la fote bann shomèr. La pa non pli la fote bann travayèr. La pa la fote bann plantèr, ni sète bann ti-l’antropriz. La pa sète bann ti-fonksyonèr. La pa la fote bann ti-kolon si nout lékonomi, nout sosyété, lé konm li lé, si li lé pa dévlopé. La pa zot fote si li lé kontrofé.

 Justin