Oté

La pa la zirouète k’i tourn, sé lo van é bann pèp i trink !*

Témoignages.re / 7 avril 2020

JPEG - 43.6 ko

Mé zami, zot i souvien néna poin lontan lo Prézidan La frans la promète li téi sava pran tout lo bann mézir k’i fo pou ède bann péi l’outre-mèr fèr fas lo corona virus é pou di sa li la frap in gran kou. Ala sak li la di : li anvoye dé port-élikoptère, inn dann loséan atlantik, l’ot dann loséan indien. Inn téi doi ède bann zntiye lite kont lo virus, é l’ot téi doi ède La Rényon épi Mayotte. Pou lo mèm zafèr.
A pène li té fine di sa bataye l’interprétasyon la komansé an touléka isi dann loséan indien. Lo préfé la di lo Mistral sar bazé La Rényon épi va ède La Rényon avèk Mayotte pou vanj kont lo virus. Mèm zour néna in zénéral lo Fazoï la di sa sé in batiman i sèrv pou apiyé : apiye ki, apiye koué ni koné pa tro. Mayotte laba lo préfé la fé dé kominiké inn épi in n’ot in paragraf la soté. Mé nou téi antrevoi déza prozé-la l’avé kankrola dann plafon.L’avé di mèm dann bato-la l’avé do koi ospitaliz 69 pèrsone mé apré la di sa la pa in bato lopital.

Astèr i di dann bato-la néna in sharjman koli alimantèr, néna galman in bann zélèv ofisyé l’apré suiv in formasyon épi san léjyonèr-pé sfèr i sava désann lo corona avèk fiziy - pé sfèr la pa sak ni kroi ditou. Pé sfèr sa in manyèr pou protèz bann zékspate la parti mète azot dann guépyé Mayotte. Si zamé l’avé bézoin tir banna laba ? L’èrla sré lo pti zénéral Fazoï ké noré rézon.I sava apiyé é pou komansé bann zékspate épi zot famiy. bin lo corona ? Lo corona La Rényon na ka ansort ali pou songn bann maoré. Dayèr néna l’avion pou transporté.
An touléka, in foi anplis la politik lo pti prézidan lé klèr konm in fon d’marmite é la pa domin li mèm va oir klèr dann son n’afèr. Konm la pa domin son l’antouraz va ékout ali.

Romark lé pa pli klèr ké dann bann zantiye-guyane. Laba néna in péi i apèl Vénézuéla é la tète lo prézidan lé mizapri par L’Amérik an konplisité avèk l’érop donk La frans. Moin lé a d’mandé si lo pti prézidan La frans noré pa konm in l’anvi kassé-brizé.. Dir ké lo ségrétèr zénéral l’ONUla di bann péi arète fé la guèr, kalkil arienk pou zigil lo virus.
An toulka lé bien fini lo tan La frans téi amenn in politik lindépandans nasyonal, é lo tan lo prézidan té in vré prézidan mèm si zot lété kolonyalist. Sète-la, sé in zirouète é si la pa li k’i tourn sé lo van é bien sir sé lo bann pèp k’i trink.

*Néna in l’avan épi in l’apré mé inn é l’ot i fé l’èr k’sar bien roasanblan.