Lakey lo sit > Chroniques > Oté
« La pa li k’i manz manzé sé manzé k’i manz ali »
In kozman pou la route
mèrkrodi 20 séptanm 2023, sanm
Médam zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.
Mézami konm di Molière lo zonm la plipar d’tan lé drolman fé, dann ziste milyé i oi pa zot zamé. Si tèlman k’in pé i s’anplègn zot lé tro gro, d’ote i s’anplègn zot lé tro mèg. Si la pa la maladi, i vo myé kontante aou konm wi lé.
Poitan ?
Mi rapèl mon papa vi k’li lété pa bon pou l’armé pars li lété tro mèg, li la komanss fé la musku é mi pé dir azot li la mète lo misk dsi son bann zo é si li lété pa gro-gro mèm, i pé dir li lété kosto.
Taka sak i va bien avèk nout kozman marké an-o la, ni pé dir souvan-défoi zot lé malade : zot i manz é zot i grossi pa. I paré sa néna in nom dann liv médssine : i apèl sa in mégrèr konstitissyonèl é mèm si lo moune i manz in ta, li pran pal o poi.
Alé ! Mi kite azot rofléshi la dsu é ni rotrouv pli d’van, sipétadyé.
Justin
