Kozman moin la mark an-o la sa in kozman demoun la Gwadloup. Moin la solman sèye mète ali dann la lang kréol rényoné... Pars zot i koné kréol sé kréol, mé tout kréol lé pa parèye : shak lang kréol sé in lang a par. Donk kozman moin la mark an-o la i di in fason dann la lang bann gwadloupéin éin fason dann alang bann rényoné. Mé alon rovir dsi nout kozman zordi : sans prop na poin difikilté pou konprann mé sans figiré-konm i di - pars shak provèrb néna son valèr par raport la sosyété ni viv dodan. Bien vré k’in fèye kan li tonm dann lo li pouri pa toutsuit. Li pran son tan épi in zour alala ké li lé pouri. Rézilta : i oi pa tout suit lo konsékans in l’évènman, in zès, kékshoz l’arivé. Avèk lo tan i oi lo konsékans, si sé in bon konsékans sansa si sé in mové, osinonsa si na poin konsékans ditou, mé sèt-la lé in pé rar. Zot i koné lo léfé papiyon-papiyon i bate la zèl é son batman la zèl néna son konsékans pou la natir. Alé ! Mi kit azot rofléshi la dsi é ni artrouv pli d’van. Sipétadyé