Prézidan i shanj, gouvèrnman i shanj, minis avèk ministrès i shanj. Sèl z’afèr i shanj pas é z’ot bataj karé dpi La Frans ziska isi épi rotour. Biensir mi dédi pa zot lo droi vizie La Rényon ; bien antandi zot néna lo droi, inn apré l’ot pou vni isi shé nou. Sèl afèr i shoz amoin in pé sé ké d’apré sak mi oi, i diré zot i pans nout péi i égzis dopi lo zour zot la poz lo pyé Gillot.

Sirman sa lé in pé normal kan ou i oi bann rényoné néna in pé lo pouvoir apré kaziman fé zénufléksyon dovan zot. Souvan dé foi, moin l’apré domandé, dann mon kèr, si nout moun isi na poin la fyèrté. Pou kosa mi di sa ? Pars dsi in bonpé d’poin nou lé an abvans par raport banna é ni fé konmsi sé zot i koné é nou ni koné pa arien. In pé d’fyèrté kant mèm lé ga.

Sirtou kan i parl l’ékolozi, i parl la protéksyon la natir, épi lo dévlopman dirab. I diré so bann-la, la fine tir dann z’ot tète tout sak parti kominis épi Paul Vergès la fine fé avansé konm z’idé pou mète La Rényon anlèr. Mi domann amoin si zot i fine obliyé momandoné l’avé in plan pou dévlop l’otonomi énèrjétik vèk, konm i di, in miks z’énèrji ronouvlab : lo l’énèrji volkan li, lo l’énèrji solèr li, lo l’énèrji lo van li, lo lénèrji a partir bann déshé plantasyon, épi lé z’ot kalité. Néna l’énèrji solèr bien sir mé pa ké sa.

Yèr aprémidi lo minis té apré raz la tète kap Bernard avèk l’élikoptèr é moin té paré domandé si lidé la pass dann son tète dann kèl sityasion nou noté té fine randu si l’avé fé in rout litoral san prétansyon épi in trin. Moin lé sir la pa bann z’ofisyèl lété an pozisyon dira li sa, mé kant mèm mi dout pa tazantan li la di oir inn dé dosyé pasé avèk bann projé d’ot ké Lo Didier épi lé zot té fine kalkilé pou fé.

Anfin kite azot fèr mé antansyon pangar, pars kon m i di souva dé foi néna in zour i apèl domin é domin sé in n’ot zour k’ozordui. Mé mi tienbo dir azot, la pal o zour zot papoz lo pyé Zilo ké La Rényon la komans égzisté.