Mon matant Zélida la ékrir Justin :
Mon shèr nové, mon spès salté, rouj-de-fon dovan létèrnité,
Somèn isi, m’a dir aou, moin lé kontan. Pou kosa ? Pars dan l’Anglétèr, na in prinsès la gingn in garson é pétèt garson-la sar lo roi lo péi in zour. Troi kilo ui san lo marmay i pèz. L’èr ki lé, i koné pa ankor kèl nom i sava nome ali. I fé arien : tout fason, li lé la, é an bone santé siouplé. Dann in n’ot péi, la Beljik, lo roi la donn démisyon é son garson la vni roi. Arzout èk sa, lo roi lé maryé avèk in madam in pé bien popilèr... Pétèt ou va di amoin an kosa sa i konsèrn amoin vi k’mi viv pa dann bann péi-la é ké dan la Frans, nana in prézidan. Pou sak li vo, démyé nora gingn in roi. Mé lé konm sa é pa otroman. Final de kont, si sa i intérès amoin, sé konm ki diré : la nostalzi ! Tok ! Pran sa pou toi !

Justin la fé pou répons :
Mon vyé matant ki koz touzour la boush rouvèr,
Lé intérésan antann aou, mé moin pèrsonèl, mi doi di aou, la pa pou sa m’a sot in ropa. Pou kosa ? Pars, fransh vérité, kan mi antann dir in z’anfann roi lé né, si mi konpran son bann famiy lé kontan, koman nou mèm lé kontan kan kisoi in z’anfan, kisoi in pti z’anfan i ariv dann nout famiy. Poitan, mi trouv sa, la roiyoté-la, sa sé l’opiome di pèp. Pou kosa ? Pars tout so l’apara, tout sak bann zournal i di, i anpèsh pa — sirtou zordi ! — bann pèp viv dann in réjime lé mové pou zot. In roi, ou bien in rène, in prins, in prinsès, sa i amélyor pa la vi d’moun. Z’anfan i sort éné... dizon li la rouv son zyé katrèr in kar. Bon pou sa mèm ! Mé lo soir, konbien z’Anglé té apré débat pou zoinn lé dé bout par l’milyé. Konbien shomèr té apré rod in pti boulo, in pti moiyin ranpli zot boujaron... An plis ké sa, kan i parl l’Anglétèr, moin mi pans Chagos é mi kalkil koman d’moun la pas mizèr, loin par rapor zot péi. Mi kalkil osi la gèr bann z’Anglé la parti fé dann Malouine. La pa moin va tonm a la ranvèrs dovan la boté d’lo marmay, l’élégans la prinsès é lo karaktèr ésportif lo prins. La pa moin touléka pou shant Happy Birthday pou li ! Tok ! Pran sa pou ou !

Justin