Na poin lontan, moin la gard in sobatkoz dsi Rényon Promyèr. Té apré sobat dsi bann problèm la vi shèr, lo mank travay é tout sak i s’ansui. Momandoné, lo zournalist, pétèt pars li té in pé fatigé antann parl solman bann jène diplomé, la di : « I fo pa obli bann jène na poin diplom, i fo pa obli nana zordi san-vin-mil pèrsone lé ilétré isi La Rényon, épi in gran kantité d’moun na poin diplom ». Moin té i majine, bann sobatèr té i sar sot la-dsi, pyé kolé inn èk l’ot, épi té i sava tir dsi tout sak i bouj san fé somasyon... Alé oir lété konm si lo bann sobatèr l’avé poin gran shoz pou di la dsi. Dizon zot lété kaziman sèk !

Poitan bann sobatèr l’avé moiyin trouv in kékshoz pou dir vi k’bann mo èk bann fraz té i bouskil dan zot boush kan té i diskit dsi d’ot z’afèr. Moin, dsi mon asoir, moin té tienbo pi asiz mon plas. Mèm moin l’avé anvi done in volé, boi vèr l’édikasyon nasyonal... pou di li lé pa a la otèr. Moin noré mèm di li tienbo pa kont asé la lang matèrnèl bann z’anfan, pars lang-la sé la lang kréol rényonèz. Moin noré di, ala in zoutiy bien konm k’i fo, é l’édikasyon nasyonal i tienbo pa kont. Moin noré di, dan l’édikasyon, konm dan bann rovni, konm dan la konsomasyon, La Rényon lé divizé an dé... na sak lé an-o épi sak lé an-ba. Sof si olèrk èt mon kaz, moin lété dan l’éstidyo, é pétèt moin té i rès konm z’oizo martin ki kouzi.

Mé zot la pa di tousala. Zot la plito arvir dsi bann jène na diplom é la poin travay. Konmsa, l’édikasyon nasyonal la bien ansort ali. Pétèt son gran shèf la pans, l’édikasyon nasyonal lé pou arien si na in bonpé shomaj La Rényon. Lé bien koni, sa la pa mon fot, sa la fot lé z’ot.

 Justin