Matant Zélida la ékrir Justin :
Mon shèr nové, mon spès salté,
l’ot soir, moin lété kontan pou vréman. Ou i koné, kant in n’afèr i fé d’tor bann rouj de fon, sa i mète amoin an joi.
Dann zournal télé, moin la vi é moin la antann in bon Fransèz, té apré di dann in laksan lopérète dann tan lontan, in laksan k’i fé shant la vi : « on les enverra voir des films et on leur donnera pas à maïnjé ».
Madam-la té i vé dir té myé donn Kréol manzé ké gaspiy larzan pou fé moniman i sèrv ar pa aryin.
Alors, la pa la vérité vré sa ? Mèm si z’ot kalité d’moun i gingn pa konprann bann z’afèr sinp, alé pran sa pou ou épi pou la sosyété out bann sanblab !

Justin la fé aèl pou répons :
Mon vyé matant,
ou lé toultan dan l’érèr ! Moin ossi moin la antann sak ou i sort di la. Solman pou moin, sé pa laksan k’i kont mé sak in moun i di : in n’afèr intélizan, sé in nafèr intélizan ; in kouyonad sé in kouyonad, mèm si ou nana in gayar laksan.
Sak madam-la la di, sé in bèl kouyonad, pli bèl ké son tèt. Pars in pèp la pa aryink in tib dizéstif : sé galman in kiltir, in sivilizasyon.
Tout zénérasyon nana lo dovoir lès in tras déssi la Tèr, kékshoz k’i ransègn bann demoun va vnir apré nou déssi sak nou té i pans, koman nou té i viv, kèl lintansyon nou l’avé, koman nou l’avé la konsidérasyon pou nout vyé zansète té i sort partou, épi koman ni èm nout kiltir rényonèz.
Toulfason, shakinn i gard l’èr déssi son montr, é si la syinn i bate la bèrlok, la pa nou l’otèr !

Justin