Matante Zélida la ékrir Justin :

- Mon shèr nové, mon spès salté,
Kossa mi antann ? kossa l’ariv azot ankor ? Moush-bleu Sumatra la pik z’ot koko ? Ala k’mi antan dir, bann rouj-de-fon i déside fé in programe pou La Rényon épi prézante sa dann zéta zénéro. La pa possib ! Bann kador nana dan la Frans la-ba va pète a rir ! Va pans issi, demoun la shoviy la gonflé, pars in bon program, toulmoun i koné : sa i sort la Frans. Touléka, la toujour sort la-ba, é nou la poin pou anplégné. Alé ! Pran sa pou toi !

Justin la fé aèl pou répons.

- Mon vyé matante k’i koz toultan la boush rouvèr,
Alors, si la-ba nana demoune de valèr, issi la poin ? Si la-ba nana bann kador, issi na poin ? Si banna la-ba i koné fé programe, nou ni gingn pa ?
Épi, éskiz amoin, programe banna lé pa tro valab pou zot non-pli, pars koméla, mi kroi zot lé pri dan l’arozoir konm sinz Madégaskar.
Mé la pa tousa, matante, vi koné ke sé out ti-t’om, out ti-prézidan ké ou i èm byin, ali-mèm la domann bann loutre-mèr pou fé z’ot programe. Li la domandé, donk nou va dir ali sak lé bon pou nou, sak lé bon pou La Rényon épi pou bann Rényoné. Nou la poin labitide pou tranm dovan graton !

Justin