Nana in n’afèr mi pans toultan. Na in n’afèr moin l’apré kalkilé toultan, toultan. Kosa i lé d’apré zot ? Bin figuir azot, sak i fé travay mon tèt, souvan dé foi, sé pou sèy konèt kisa sé bann zintéléktyèl, zordi, dan La Rényon. Moin lé sir, in pé i doi dir, ala bien in késtyon in lintéléktyèl i pé pozé... Pou mon par, moin la parti rod in lésplikasyon dann diksyonèr, é moin la trouv a popré lésplikasyon-la. In lintéléktyèl, sé in moun nana lo gou pou bann zafèr lé rapor léspri, lé rapor lintélizans. Dizon, in moun nana lo gou pou fé travay son léspri, sé in lintéléktyèl.

Mi koné pa si zot i suiv amoin, sansa si zot i pans la késtyon la fine pèrd son rézon pou égzisté dann karo zèrb dé z’inn. Poitan, mi pans lé pa difisil pou majine demoun apré réfléshi dsi la kondisyon imène. Mi pans demoun-la, sa zintélékstyèl ! I doi zète an tou lé ka. In moun i kalkil koman shanj lé shoz zordi i doi zèt osi, kisoi dann in sans progrésis, kisoi dann in sans réaksyonèr. Nana zintéléktyèl de gosh, mé nana osi bann zintéléktyèl de droit, bann pogrésis konm bann konsèrvatèr, épi bann révolisyonèr.

Astèr, si ni kalkil in pé lo rol in lintéléktyèl dan la politik : in pé i di zot lé neutr, in pé i di zot lé angajé, in pé i pran zot kart in parti. Lo mo lé lashé ? In lintéléktyèl i pé prann son kart dan nout parti ? Mi pans oui. Pou kosa ? Pars nout parti la touzour été landroi demoun i fé travay zot tèt, pou shanj lé shoz dann in sans progrésis. Dopi lo révèy nout kiltir an pasan par la réfléksyon dsi bann problèm zordi ziska koman k’i prépar l’avnir.

Té i falé dmoun té i fé travay zot léspri, zot lintélizans pou armèt anlèr lo maloya, lo kont popilèr, lo moring. Té i falé d’moun té i fé travay zot léspri pou domann la départmantalizasyon épi lotonomi, lotonomi énèrzétik, é tout sak nou l’amèn dann déba dsi La Rényon. La pa pars in pé i gnor sak nou l’aport dan lo déba politik, kiltirèl, ékonomik, anvironmantal ké nou la pa aport arien. La pa pars in pé i kroi ankor la tèr lé plate ké li lé pa ron.

Justin