Oté

« La pa pars ou i asiz dsi in shèz, ou i doi kroir mi toush pa la tèr »

In kozman pou la rout

Justin / 27 zwin 2019

JPEG - 43.6 ko

Mi pans sa in provèrb la Gwadloup moin la mète an kréol rényoné. Néna lontan mi koné ali, mé néna lontan galman mi kass mon tète pou konprann ali. A ! Moin lé sir, rantre zot, néna in pé i doi pans la pa bézoin bak+25 pou konprann in n’afèr fasil konmsa. Sans prop la poinn problèm, mé sans figiré-pars in provèrb, d’apré sak mi kroi i vo arienk pou son sans figiré-kosa sa i vé dir pou vréman. Kisa i asiz dsi shèz ? Sirman pa bann travayèr manyèl ! Bann zésklav ! Sansa bann z’angazé konm zot i pé konprann. Mé bann moun anlèr pars zot l’avé lo droi asir kan zot l’avé anvi si tèlman ké zot téi pans zot lété sipèryèr par raport lé zot. Poitan zot lété d’moun konm lé zot ! Zot téi viv konm lé zot é zot téi mor konm lé zot. Si tèlman ni pé dir zot kondisyon imène té pa sipèryèr sète lé zot. Ala koman mi oi sa é mi kite azot pou zot rofléshi la dsi épi ni artrouv pli d’van. Sipétadyé !