Oté

« La pa pou dé-troi pinèz mi sar zète mon payass ! »

In kozman pou la rout

Justin / 20 zwin 2019

JPEG - 43.6 ko

Mi koné pa si d’moun koméla i koné ankor kouk i lé pinèz. Mi koné pa non pli si zot i an souvien payass. Sinploman pars nou la fé progré isi – la baba. An touléka, mi rapèl payass pars sa té lo ranplasann matla : in sinp sak an toil épi bouré anndan avèk la paye kisoi mayi-sa té i krak kan ou téi alonz dosi - kisoi la mous la foré-sa téi san bon sa ! An touléka, dann tan mi anparl azot la plipar d’moun l’avé poin in vré matla pars i falé ou l’avé lo pourkoi pou sa. Pou anshévé, tazantan pinèz téi vien fé son ni d’dan é lété pa rar kan ou i lèv ou i an apèrsoi pinèz la mord aou dan la nui. Sansa kan li la mord aou ou la fou ali in tapin é lo san lé ankor dsi ou landmin matin. Astèr nout provèrb : mi pans néna in provèrb fransé i di : « I zète pa lo zanfan avèk lo d’lo d’bin » é nout provèr i vé dir, sanm pou moin, la pa pou in sinp linkonvényan ou i sava priv aou d’in konfor sansa d’in nésésité. Alé ! Mi kite azot rofléshi la dsi é ni artrouv pli d’van. Sipétadyé !