Oté

« La pa pou dé-troi pinèz mi sava zète mon payass »

In kozman pou la rout

Justin / 9 novanm 2018

JPEG - 43.6 ko

Kan moin lété marmaye l’avé dann mon l’anvironman in bonpé parazite. L’avé lo pis, l’avé lo pou, l’avé kankrola, lo moush, l’avé ankor fourmi épi l’avé pinèz-demoun téi apèl ali pinèz morpin. Béstyol-la, sa i mord épi sa néna in pti lodèr lé pa gayar ditou. Dann matla-i di galman dann payass - pinèz téi fé son dimansh, li fé son pti kaloubadia. Moin lé sir koméla, si désèrtin i trouv pinèz dann matla, zot lé riskab zète lo matla… sansa apèl fridom. Lontan lété pa radikal konmsa : téi mète plito lo payass dann solèye asé lontan, téi tourn é rotourn é té bon pou sa mèm. Mi di pa lodèr pinèz téi disparète san pou san mé té potab pou dormi dsi. Dann kozman bann fransé i di konmsa : « I zète pa lo zanfan avèk lo lo bégnoir ! ». Donk i zète pa lo prinsipal avèk lo sogondèr. Sa i di bien sak i vé dir é mi lèss azot rofléshi la dsi. Ni artrouv pli d’van sipétadyé !