Kosa i lé in zèf klèr ? Sanm pou moin sa in zèf la pa fékondé donk fé kouv ali si ou i vé, ou i gingn ar pa in pti poulé. Sé in n’afèr k’i ariv mèm si ou na kok dann out baskour. Pé s’fèr osi, dann la bann, in kok lé stéril - mi koné pa si i di tamann pou bann kok galman ! Sé dé shoz k’i pé arivé. Donk si out poul i ponn in zèf klèr, kosa ou i fé avèk li ? Ou i pé tyé ali ! Mé kansa ou i romark lo zèf lé klèr ? I fo atann 21 zour pars mi koné pa in tak-tik pou aprouv in zèf lé klèr lo mèm zour ké lo poul la ponn. Sak mi koné sé ké poul i kouv 21 zour avan lo pti lé éné. Lé éné sansa lé pa éné ditou. Mé si inn solman lé klèr, lo patoi na rézon la pa bézoin tyé out poul mé kosa sa i vé dir ozis ? Mi pans, i vé dir, la pa bézoin pran in grav désizyon kan k’i baz dsi arien, o sinonsa kan lé pa an proporsyon avèk sak ou i roprosh. Alé ! Ni artrouv pli d’van é mi lès azot kass z’ot tète la dsi.