Lakey lo sit > Chroniques > Oté
« La pa réponn ni pin ni makatia »
In kozman pou la route
lindi 18 séptanm 2023, sanm
Médam, zé Méssyé, la sossyété koz èk mwin sé koz èk in kouyon, mé sé o pyé d’lo mir k’i oi lo masson.
Mézami, néna dé foi kan wi koz avèk in moune i réponn aou, défoi i réponn pa ou. Sa i dépann lo moune pars in pé i yèm bien kozé é d’ote i yèm pa mé lé konmsa pars lé konmsa é pa otroman.
Mi koné in moune i di, li, li lèss pa tonbé. Bon zafèr, mové zafèr, i fo li réponn. Si i di ali A, i fo li réponn B é si i rodi ali C, li réponn D mé zot i konpran sa sé inn suite san fin - kaziman in shène krapo d’kozman — é dann inn suite san fin ou lé riskab pèrde oute lénèrzi é sé pa lo méyèr zafèr k’i pé ariv aou.
Sé pou sa ké défoi déssèrtin i désside pi réponn, donk réponn ni pin, ni makatia, mé shakinn i fé son shoi. Shakinn i pé di : « Mi réponn, sansa mi réponn pa ». Sa sé kant mèm noute libèrté… Mézami in zour mwin la trouv in moune déza in pé izazé dann in biro d’vote : mwin la di ali bonzour, li la fé amwin in sign de tète. Mwin la domann son nouvèl, li la aprouv avèk la tète. I paré li la désside arète kozé si tèlman demoune téi panss li té in parl pa.
Alé ! Ni artrouv pli d’van sipétadyé.
Justin
