Accueil > Chroniques > Oté
La pa sa léspri lo ko-dévlopman
Madame la ministrèz l’Outre-mer,
lundi 29 novembre 2010, par
La ministrèz l’Outre-mer, i sort nonm dé-troi gran grèk pou sèy dévlop lésportasyon bann péi l’Outre-mèr. Konm èl i di, pou kapar bann marshé an déor. Touléka, sé sak, sanm pou moin, èl la di dann son kozman. Sanm pou moin sé sak èl la koprann dann gran-kozman lo pti prézidan,l’ané dèrnyèr,lo sis novanm.
Ko-dévlopman : l’ède inn-a-l’ot, la solidarité
Touléka, sak mi romark, èl i koz pa mèm langaz ké nou, pars èl i pans pa konm nou. Pars kan ni di ko-dévlopman ni pans pou komansé la solidarité. Sa i vé dir lo kou d’min lé z’inn va nyabou donn lé zot, lo partaz rant lé z’inn épi lé zot. Sa i vé dir, ni mète ansanm shak foi sa lé bon pou nou an avoir in bon rézilta. Shak foi, ni sign in bon z’akor. In légzanp ? Ni pé mète ansanm pou an avoir in konpagni bato é par proférans bann bato i marsh avèk lénèrji prop. Lé kapab fé sa koméla ! In n’ot légzanp : nout fors sé nout lékonomi la konésans. La-dan ni pé donn lé zot in kou d’min. Nout féblès sé nout ti téritoir donk sak lé pli gran ké nou, i pé donn anou in kou d’min pou nout sifizans késtyonn manzé.
La ministrèz l’Outre-mer i pans pa konm nou
Pou èl i fo kapar lo marshé lé z’ot. Mové kalkil ? Oui, pars si La Rényon i fé mèm kalité marshandiz ké Maurice ou byin Madagaskar, an pli shèr, kisa k’i gingn ? Banna, é pa nou. Bon kalkil ? Oui, si sé pou vann bann marshandiz i fé dan la France é banna i fé pa, si bann kapitalis i fé l’izine dann péi an déor pou gonf zot pla ? Lé bon pou zot, lé pa bon pou nout bann voizin,lé pa bon pou nou..
Moin lé byin dézolé, mé madam la ministrèz i fo ou i rovoi out plan. Pars dann out mazinasyon, dann out projé, sé nou k’lé pèrdan é a tou lé kou, é lé zot lé gagnan. La pa sa léspri lo ko-dévlopman.
