ézami, mi sorte antann dann radio in n’afèr mi koné mé sé sirtou kan i ariv la rantré lékol k’i anparl dann radio épi dann télé é l’afèr mi anparl azot i konssèrn bann zanfan La Rényon. Dabor ni koné néna par-la karante pour san dmoune pov issi shé nou mé pliss sinkante pour san bann marmaye i viv dann bann famiye pov-sé dir linégalité koman lé for dann noute péi.Bonpé pli for ké laba dann La franss é plito parèye bann péi l’outre-mèr « franssé »-konm i di.

Biensir dann bann famiye pov kan i ariv la rantré lékol bann famiye i gingn l’ARS mé alon pa kroir toute demoune lé satisfé dsa. Zot i koné larzan-la la fine rante an pèyman sé zour issi é bann paran sirman va gingn lo tan avèk so larzan pou prépar la rantré dann bone kondission pou zot zanfan..Biensir zot i koné la pa toute bann famiye i toush larzan-la pou zot zanfan é néna demoune lé pa kontan.

Shak rantré lé parèye é shak rantré néna demoune i di dann téléfone zot lé konte k’i vèrs so larzan-la pou bann marmaye pars sa i ansèrv pa arien . Solon zot la pa larzan-la va fé myé travaye bann zanfan i travaye pa bien.Arzoute èk sa d’apré zot sé sirtou bann magazin k’i profite sète arzan- é an finnkonte l’ARS lé pa in solission pou rétablir in sorte l’égalité rante bann zanfan épi dan la sossyété rényonèz.

Drol de rézoneman kan mèm k’i voudré oir larzan piblik alé sirtou dan la posh sak néna é i détourn la posh sak na pwin mé sa la pa nouvo é sirésèrtin in pé va kontinyé koz konm zot i koz é sa va bien ède lo gouvèrnman kontinyé rabote dsi larzan bann pov san vide la posh bann rish. A bon antandèr salu !

Justin