Souvnir lékol, sa out dalon pou la vi : bon souvnir, konm sak lé moin bon, sa i larg pa nou, mi pans, ziska nout dèrnyé zour...
Mi ansouvyin, tan-la, lavé in proféssèr filozofi, té i apèl Henri Lapierre : moun-la té i koné oir tout zafèr, près insinifyan, épi li té i tir in moral, sansa konm i di, in lansègnman, sinonsa li té trouv in sans.

Donk, in zour, li té apré parl déssi "la rumeur", sansa, konm i di an kréol, in la di - la fé. Li di anou : in blan d’zèf, sa lé pa konsékan ; mé kan lo zèf lé tro frit, ou i mash, ou i mash blan d’zèf- la. Oplis ou i mash, oplis nana ! Tanpir k’ou i mash, tan pir k’nana !
Sa té i vé dir, pou li, a partir près aryin i gingn fé kékshoz. Nout tout konpran sa fasilman !

Pou kossa mi parl dé sa ? Pars, déssèrtin radyo, konm déssèrtin zournal, i pran in fé-divèr, i tourn sa dann tout sans, ziska demoun i kroi sé sa mèm laktyalité, sé sak lé inportan.
An plis ké sa, si i nyabou fé pèr d’moun, si bann moun zot mèm i fane z’ot pèr otour d’ zot, la lé bèl la ! La lé gayar ! Épi, i fé oubli in pé la kriz, la mizèr ou lé d’dan, épi in mové politik.
La pa sa mèm, manipil lopinyon ?

Justin