Médame, Méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, mi koné d’moune i yème ésplinde. Sak i ariv azot lé touzour konm in tuile i tonb dsi zot tète. Zot i pran touzour lé shoze sou in zour lo pli défavorab. Wi diré, pou zot, na poin arien d’bien i ariv azot dan la vi.

Romarke azot bien néna Zan ki ri épi néna Zan k’i plère. Zan ki plère lé la pou splinde ali, Zan ki ri lé la pou amize ali avèk in pé toute zafère. Dann toute shoze néna in bon koté pou zan k’i ri. Dann toute shoze néna son mové koté solon zan k’i plère.

Nelson Mandela téi di in n’afèr é mi kroi li téi panss pou vréman. Li téi di : « Soi mi gingn soi mi aprande ». Sa sé in fasson pozitif pou oir lé shoze. Mi diré afors aprande li la fini par gagné dann in sityassion bien difissil.

Alor mézami, alon suiv konsèye bande gran zansien é mwin lé sirésèrtin ké la viktoir lé o boute la route.

Alé ! Mi kite azot rofléshi la dsi é ni artrouv pli d’van. Sipétadyé.