Kan la fini, wi antan parl dann radio, wi pé mèm oir sa dann télé mé tro tar biensir pou partissipé. Dé foi wi di si mwin téi koné l’avé in n’afèr konmsa mwin nora débrouye amwin pou alé, sansa pou inform amwin dsi linternet.

Pars d’apré mwin linformassion i porte dsi sak i sava éspassé, épizapré dsi sak i éspass kan li éspass, épi aprésa kan i fé lo bilan pars lo bilan ossi sa lé inportan.. Lé vré ké zordi avèk lo trépé zoinal k’i égziss, lé dir dir pou lé o kouran pars finalman ou lé o kouran d’trépé d’shoz…

Sof kan néna in lévènman k’i kraz toulézot konm lo gran raid pars sa la okipe linformassion in somenn de ran.Antansion mi roprosh pa arien so bann kours-la.Dizon lo gran piblik donk ou, donk mwin nou la antann sa inn somenn de ran.

Si mwin l’avé in konsèye pou doné, mi diré si i vé roganiz in lévènman médyatik, i fo évite fèr sa la somen gran raid pars dizon franshman oute lévènman i sava tonb dann létoufoir é an déor gran raid lé possib wi gingn pa suiv d’ote zévènman pandan in somenn.

Alor, koman i fo fèr ? Oziss mi koné pa, pars san bonpé moiyin wi ariv pa anparl d’ote shoz ké lévènman médiatik néna lé moiyin pou étouf toulézot.. In zour mwin la antann in moune dir i fo fé in plate-form médiatik pou lo moune i viv dann nout réjyon loséan indien pa pou anparl toute zafèr mé pou fé in bon sélékssion.

Mi atann lo zour in n’afèr konmsa va égzisté, pars pou linstan ou lé okouran déssèrtènn shoz mé pa bonpé é kan néna inn i kraz lé z’ot ébin an déor dsa wi koné pi arien…Wala kon m mi oiklé shoz mé pétète konm ki diré monka sé in katapar.

A bon antandèr salu !