Dabor i fodré konète lo poursantaz labstansyonist pars lo sondèr li-mèm kan i intéroz api pou zéléksyon li di band list éléktoral La Rényon lé pa konm ki fo pars in bon poursantaz demoune marké dsi la list i rèss pi issi shé nou. I pé di ossi zot la fine shanj landroi dann lo péi li mèm é lé difisil azot pou alé voté.
Mwin la antande lo sondèr apré di 30 % dann lirn sa i vé pa dir 70 % labstansion mé an réalité par-la sinkante pour san votan épi sinkant pour san bande labstansyonist. Mi koné pa si lé vré mé noré 40 % zéléktèr marké dsi lalist éléktoral lé pa an éta pou voté.
Gouvèrnman néna ka ordone l’aproptaz apré nou va gingn koz itil.

Astèr si ni sèye konprande pou kossa néna 50 % votan é 50 % votan pa ni pé éssèye oir lo bande mové rézon :
la fète dé pères, la fète dé mères, bande kominyon, mi pans pa sa i tienbo la rout pars, koméla buro d‘vote lé pa loin, é pou fèr in tour pou lo votaz lé pa la kroi épi la banyère… Lo bande zélu i ansèrv pa gran-shoz, zot i pans zot posh é pa lintéré d’lé zot-toute la band lé volèr… Alor pou kossa bande zom (fam) politik lé popilèr konmsa ? Ala ankor in mové rézon.

Lo mil-fèye administratif ? Sa i pé z’ète in rézon mé sa i ramenn anou lo rapor Cousseran. Parétré-t-il in moune la vu avan lé zot lo danzé lo mil fèye administratif é ziska zordi la pa sinplifyé lé shoz, la mèm konpliké.
Ni pé di ossi la popilassion rényonèz lé malkontan é zot i oi pa zéléksyon pou tir azot dann traka. L’èr-la lé danzéré konm pa pars si la vi démokratik i sifi pa kèl sé lo bon métode ? Pou ariv o bon rézilta ? Mwin sré tanté d’dir la lute de mass… Mé sa i komande pa avèk in baguète majik osinon volcan la pan kor paré pou pété. Alon aspèr ankor in pti pé pa pou in révolt, mé pou in révolission. A fors alé a lo, kalbass i pète.

A bon ékoutèr, salu !

Justin